Khawdur piah lama êng ka hmu – Mikel Arteta

Arsenal manager Mikel Arteta chuan Premier League season bul an ṭan chhia tih a pha lo a, amaherawhchu beidawnna piah lam rama ni eng mawi tak lo chhuak tur chu a hmu – a naute chungah huaisen takin rinna a nghat ngam.

Gunners hi an match hmasa pathumah an tlawm vek a nih kha, a vawi linaah erawh Norwich City 1-0 in an hneh; zanin dar 7:30 hian Burnley an lenchilh chhunzawm leh nghal ang; European football an khelh loh avangin an hahdam dawn.

Arteta chuan, “A chang chuan hringnun hian kan thunun theih loh thil a rawn ken tel chang a awm ṭhin, eng pawh hi chhan neia thleng a ni tih erawh kan hriat a ngai. Kan duh loh thil a lo thleng a nih pawhin kan hmachhawn chu a ngai ṭhin.

“Thil ṭha zawk duhna avangin kan hun tawn kha chu a hrehawm hle, mahse kan tana ṭha tur a nih kan hriat a, rinna leh beiseina nung kan neih a ngai. Ka ngaihtuahna tam zawkah hian thil ṭha lam a awm ṭhin, tunah pawh beiseina eng ka nei,” tiin a sawi.

North London club hian hliam leh hripui leng avangin buaina an nei a, midfielder pawimawh Granit Xhaka chu hrem avangin an chhawr thei lo mek. Defender thar Ben White erawh a inkhel panngai leh thei tawh thung.

Thomas Partey pawh Norwich an hneh ṭumin bench aṭangin a lut thei tawh, zainah chuan bul ṭan turin a inpeih ang. Si ban nghak turin Aaron Ramsdale leh Bernd Leno nge a chhawr zawk dawn a sawi duh lo a, player ṭha zawk an nih theih nan an inel thu erawh a sawi.

Arsenal khingpui tur Burnley hi tun season kal laia chak la nei lo an ni a, a vawi khat nan chak an tum dawn; insiamṭhat tuma hma la mek Gunners nen hian an inchai tawk viau mai thei a ni.

Source SL

Related Posts

Leave a Reply

Your email address will not be published. Required fields are marked *

error: Content is protected !!