Football history-a Player Man to XI

Kum 10 liamta vel atang khan Football club lamin hlawkna an hmu nasa hle hle a, player lei leh hralh chhuahah pawh sum an seng tam thei hle.

Tun tumah hian Football history-a player man to zual Starting XI te kan rawn tarlang ve leh dawn a ni.

1. GK – Kepa Arrizabalaga – €80 million

Kepa Arrizabalaga

Premiere League club Chelsea Football club chuan kum 2018 khan khawvel goalkeeper man to ber ni turin Athletic Bilbao atang Kepa Arrizabalaga hi an la lut a, mahse, Premiere League history-ah transfer chhe ber a ni, a chhan chu Stamford Bridge lamah duh angin leh beisei angin a che tha hlei thei lo.

Maurizio Sarri’an Chelsea a enkawl lai khan Kepa hi thlak a tum a, mahse, Kepa hian alo hnar a nih kha, heta tang hian a lar chho hle. Club lam pawhin chhuahtir an rilruk ve bawk. Mahse, amah duhtu club an la lang thei rih lova, club tan chuan loss hlang a nih hmel.

2. LB – Benjamin Mendy – €57.5 million

Benjamin Mendy

Monaco tan a chet that em avangin Manchester City chuan sum tamtak sengin Benjamin Mendy hi an la lut a, mahse, a man to ang huin City lamah hian a che thalem lo, hliam neuh neuhin a ti buai ve reng a, harsatna hrang hrangin a tlak buak a ni.

Manchester City-ah hian Season 4 vel a awm tawh a, mahse, match 73 ah chiah ala inlan thei a ni.

3. CB – Harry Maguire – €87 million

Harry Maguire

Kum 2019 khan Manchester United chuan Leicester City atangin Harry Maguire hi €87million laiin an la lut a, English history leh khawvel defender man to ber a ni mek.

Harry Maguire lak luh nan Manchester United in sum an hman hnem em avangin sawiseltu pawh an pung hle, mahse, Manchester United player tha ber pakhat a ni mek.

Leadership a nei tha a, experience a nei tha bawk a, United lam hian an la chhawr zel a rinawm.

4. CB – Matthijs de Ligt – €85.5 million

Matthijs de Ligt

Juventus chuan European club hrang hrang te duh rawn Matthijs de Ligt hi kum 2019 khan an la lut a, Turin lamah hian bul a tan tha lem lo, mahse, tunah chuan Juventus key player a ni mek.

Tunah hian kum 21 a upa chauh ala ni a, Turin-ah hian hmalam hun eng tak a nei mek.

5. RB – Joao Cancelo – €65 million

Joao Cancelo

Kum 2019 khan Manchester City chuan Juventus atangin Joao Cancelo hi an la lut a, club tan a khel tha ang reng.

Pep Guardiola hian a chhawr nasa hle a, Pep duh dana khel thiam player pakhat a ni.

6. CM – Frenkie de Jong – €86 million

Frenkie De Jong

Dutch rawlthar Frenkie de Jong hian dream pakhat a nei a chu chu FC Barcelona tana khelh theih hi a ni. Kum 2019 khan a dream a hlawhtling, FC Barcelona chuan an club tan an la lut hlawl, tunah hian Catalan club lian FC Barcelona tana player pawimawh tak pakhat a ni mek.

Tunah hian kum 24 a upa chauh ala ni a, midfielder angin khel thin mahse, forward lama khel turin an duhsak zawk.

7. CM – Paul Pogba – €105 million

Paul Pogba

Kum 2016 khan Manchester United chuan khawvel player man to ber ni turin Juventus atang Paul Pogba hi €105million lai maiin an la lut a, mahse, Red Devils plan neih angin Old Trafford lamah a che tha lem lo.

Old Trafford lama a chet dan chu a inpawlh nuk mai, chet that chang a nei a, chet that loh chang a nei bawk. Manchester United match 199 lai a khelh tawh atangin goal 38 a khung tawh a, kum 2017 khan Europa League nomawi a chawi pui bawk.

8. CM – Philippe Coutinho – €135 million

Philippe Coutinho

Philippe Coutinho hian dream pakhat a nei a, chu chu Barcelona tana khelh hi a ni, kum 2018 khan Barcelona chuan an la lut ve ngei a, mahse, a dream neih te chu mangchhiaah a chang zo, Nou Camp lamah beisei angin a che tha lem lo.

Barcelona tan chuan loss na pa khat a ni.

9. RW – Ousmane Dembele – €135 million

Ousmane Dembele

Ousmane Dembele hi Barcelona chuan sum tamtak hmangin an la lut a, mahse, Barcelona plan neih angin thil a awm thei bik lo. Camp Nou ah hian hliam neuh neuhin a ti buai ve reng a ni.

Kum 24 a upa Dembele hi FC Barcelona tan match 118 ah inlan tawhin goal 30 a khung tawh , season 4 lai mai hun a hmang ve tawh a ni.

10. LW – Neymar – €222 million

Neymar Jr

Neymar chuan khawvel player man to ber ni turin FC Barcelona a chhuahsan a, Paris Saint-Germain a pan a ni. Tunah hian khawvel player tha ber ani mek.

Paris Saint-Germain tan match 116 a inlan tawh atangin goals 87 lai a khung tawh a ni.

11. ST – Kylian Mbappe – €145 milion

Kylian Mbappe

Kum 22 a upa Kylian Mbappe hian hmalam hun eng tak a nei mek, Cristiano Ronaldo leh Lionel Messi thlaktu tura rinkai ber pakhat a ni mek a, PSG tan match 171 a khelh tawh atangin goals 132 lai a khung der tawh. Tunah hian Real Madrid nena sawi zawm mek anni.

Source 90Min

Related Posts

Leave a Reply

Your email address will not be published. Required fields are marked *

error: Content is protected !!