Euro 2020 Report: Turkey an hneh hnuah Italy in record thar an siam

Euro 2020 chu khelh tan a ni ta a, game hmasa berah Group A-a awm Italy leh Turkey te inhmachhawnin, Italy hian si thum faiin hnehna an changa, bul an tan tha hle.

Game hmasa ber hi Italy khawpui Rome-a mi 70,000 lenna Stadio Olimpico-ah khelh a ni a, entu mipui 16,000 bawr vel hmaah Italy hian nuamsa takin hnehna an changa, hei hi Euro khuh hawnna inkhela in hneh nasat berna a ni nghe nghe a ni.

Italy tan hian Lazio striker Ciro Immobile leh Napoli captain Lorenzo Insigne te’n goal khat ve ve an khung bakah, Turkey defender Merih Demiral chuan lamah a tilut palh bawk.

Italy hian inkhel an thunun zawka, a hlauhawm zawk pawh an ni. Turkey hi an tawm hle a, an tlar hnung an veng uluk a, an tum angin an khel thei viaua, first half-ah goal an chhuah lo.

Turkey hian first half chhungin shot vawi khat mah an nei lova, Italy goalkeeper Gianluigi Donnarumma a awl hle a, Turkey tlarhnung erawh Italy tlar hma leh fullback lamin an chhaih buai zeuh zeuh reng thung.

Sawi lan tan angin 0-0 in first half a tawpa, second half-ah Turkey lam hi first half aiin an tawm lo hreta, mahse vanduaithlak takin Juventus defender Demiral chuan Domenico Berardi-a ball cross chu an lamah a tilut palha, second half tir lamah Italy hian hma an hruai phah.

First half-ah Turkey an tawma, Italy lamin goal an khung thei lo; Second half-ah an rawn chhuak deuha, goal an chhuah zui bawk nen, an tan tawm reng thei a ni ta lo. Goal khung tumin Italy nawr ve mahse, an tlarhnung a pawp chho va, darkar khat chuang khelh a nihin Italy hian an goal hnihna an khung zui leh bawk.

Italy goal hnihna hi Immobile-a khung a ni a, Turkey goalkeeper Ugurcan Cakir-a’n shot a save per chu Immobile hian goal-ah chantirin, 2-0 in Italy hma a hruaipui. Italy hian 80mins hma chiahin an goal thumna an khunga, box chhung veilama awm Insigne chu ball pek niin, Insigne hian tihsual awm miah lovin Turkey goal-ah mawi takin ball a chhuih luta, 3-0 in Italy hi an chak ta a ni.

Euro history bikah game hmasa ber (opening game) khelhah inhnehna lian ber a la ni. Italy record thar a ni e.

Source SL

Related Posts

Leave a Reply

Your email address will not be published. Required fields are marked *

error: Content is protected !!