Donnarumma-A’n AC Milan A Chhuahsan Dawn Chiang Tawh

AC Milan chuan an goalkeeper Gianluigi Donnarumma an chan ngei dawna, Donnarumma hian June thla ral rualin a contract neih lai a hmang zo dawna, hemi hnu hian an inthen tur thu AC Milan technical director Paolo Maldini chuan a sawi.

Italian goalkeeper hian kum 16 mi lek a nihin Milan tan a game hmasa ber a khela, insawhnghet zuiin, season ruk liamta chhung khan Milan si ban nghaktu ber a ni a, Milan-a a zinkawng chu a tawp dawn ta rih a ni.

Kum 22 mi Donnarumma hian club zawm tur lamah buaina a neih a rinawm loh hle a, club tam tak
nen sawizawm a ni a, Chelsea chu a langsar ber an ni nghe nghe

Maldini chuan Donnarumma chungchang zawhna chhangin, “Professional hi chuan a tul chuan an kawr hak an thlak hreh tur a ni lova, club pakhata career bul tana, career hman zawh thak hi a harsa tulh tulh tawh.

“Milan tana theihtawp chhuah te hnena lawmthu sawi hi kan bat a ni a, Gigio pawh hian kan club tan theih tawp a chhuaha, club a zah lo ngai lo. Kan zinkawng chu heti hian a inthen dawn ta a, duhsakna sang ber ka hlan mawlh mawlh a ni,” a ti.

AC Milan hian Donnarumma thlaktu tur an lalut thuai dawnin a langa, Ligue 1 champion Lille goalkeeper Mike Maignan chu an lalut fel tep tawh niin tarlan a ni.

Chanchinbu mi rintlak te tarlan danin Maignan hian Milan-ah medical a nei fel tawh nia an sawia, kum 2026 thleng daih contract a ziak dawn.

Milan hian French keeper Maignan manah hian euro maktaduai 13 an thehchhuak nia sawi a ni a, add-ons nen Maignan-a man hi euro maktaduai 15 vel kai chho tura ngaih a ni.

Related Posts

Leave a Reply

Your email address will not be published. Required fields are marked *

error: Content is protected !!