De Bruyne – Chelsea in UCL nomawi an chawina final match kha ka en leh en loh ka hre lo

Belgian star Kevin de Bruyne hian Manchester City tan major trophy 6 lai a chawi tawh, hetah hian 2020/21 Premiere League nomawi pawh a tel.

Mahse, UEFA Champions League final-ah a club hlui a hmachhawn dawn a, Porto-ah hian hnehna chan ngei a duh thu a sawi.

Chelsea in kum 2012 a Champions League nomawi an chawi lai khan Kevin de Bruyne pawh hi Chelsea player a ni ve a, mahse, Munich lamah kal tura hriat tir a nih loh avangin final match a en leh en loh a chiang lo niin a sawi.

Kevin de Bruyne (Chelsea lama a awm lai)
Kevind de Bruyne at Chelsea teammates

“Kum 6 liamta chhung khan trophies kan chawi hnem hle, eng inelnaah pawh kan tha em em a, hei hi ka duh ber a ni.” tiin Kevin de Bruyne chuan a sawi.

“Hnehna chan leh zel hi ka duh, kan khelh leh tur pawh hi ka nghak seng tawhlo, hnehna chan leh ngei kan tum ang.”

Kan hriat angin Chelsea boss Thomas Tuchel chuan City hi kar tlemte liamta chhung khan vawi 2 ngawt alo hneh tawh a. Mahse, Pep Guardiola khan game hnih an khelh tak kha a thlak kual nasa hle. Kevin De Bruyne chuan final an khelh tur hi a hma ang an nih tawh loh a ring.

“Tunah chuan dinhmun dangah kan awm tawh. A hma game hnih kan khelhah kha chuan thil tamtak thlak danglam a ni a, manager khan a team rem nena hnehna chan ngei ngei a inrin vang a ni.”

“Semi-final-ah khan kan che tha lo. Mahse, league game-ah kha chuan half time-ah kan che tha hle. Kan thlen chin atanga an rawn comeback tur kha chu a harsa dawn niin ka ngai hman. mahse, an rawn comback a nih kha.”

“Champions League final han khelh meuh chu a boruak a dang zaih ang, engkim pek hun a ni.” tiin a sawi.

Chelsea in Champions League nomawi an chawi hma thla 4 velah khan Blues chuan Belgian star Kevin de Bruyne hi an la lut a, pre-season game an khelhah Chelsea tana a game hmasa ber a khel nghe nghe.

Club legend Didier Drogba’an chakna goal penalty hmanga a pet goal tum khan De Bruyne erawh Munich lama kal ve turin sawm a ni lo.

A hnu lawkah phei chuan Genk lamah loan in a chhuak nghe nghe a, TV velah final a en leh en loh thu a hre tawhlo niin a sawi.

“Kha tih lai khan ka awm lo, min sawm ve lo ah ka ngai. Engmah kha ka hre tawh lo a ni ber mai.”

“Champions league finals hrim hrim hi chu a changin ka en a, a changin ka en lo. A hun leh hmun a zir a ni mai. Chelsea in nomawi an chawina final kha ka en leh en loh ka hre miah lo.” tiin De Bruyne chuan a sawi.

Chelsea-ah khan kum 2 leh a chanve a awm ve hman a, Chelsea tan matches 9 ah chiah a inlan thei Belgium leh Germany lamah te loan in a chhuak tam zawk a ni.

Source The Sun Football

Related Posts

Leave a Reply

Your email address will not be published. Required fields are marked *

error: Content is protected !!