Dani Alves’an Man City-a inchhirna a neih a sawi

FC Barcelona star hlui Dani Alves chuan kum 4 liamta-a Manchester City lama Pep Guardiola a zui loh vanga a inchhir thu a sawi chhuak.

Dani Alves hi FC Barcelona-ah khan Pep Guardiola’an a la lut a, FC Barca-ah khan right back hlawhtling tak pakhat a ni a, hlawhtlinna ropui tak changin, trophies 23 lai a chawi hman a ni, kum 2016 khan Barcelona a chhuahsan.

Serie A club lian Juventus lamah season khat hun a hman hnuin, Premiere League club lian Manchester City nen sawi zawm an ni, mahse, duhthlang thei dinhmuna a din laiin Ligue 1 club Paris Saint-Germain chu a free in a zawm ta zawk.

“Kum 2017 a Pep Guardiola nen thawh dun leh theihna ka neih laia Manchester City ka lo pan lo chu ka inchhir,” tiin Dani Alves chuan SporTV a hrilh.

“Pep Guardiola te ang bula awm chu, englai pawhin chhuah theihna tur a zawng reng, thil tamtak a pek belh ang che. Ka inchhirna em em pakhat pawh amah nena kan thawk dun leh lo kha a ni.”

“Mahse, PSG ka pan avangin ka inchhir chuang a, PSG-ah khan nun nuam tak ka hmang,” tiin a sawi bawk.

Alves hi PSG lamah season 2 hun a hmang a, hemi chhung reiloteah hian trophies 6 lai a chawi hman a ni. Kum 2017 khan Man City chuan right back atan Kylie Walker leh Danilo an la lut a nih kha.

Source SL

Related Posts

Leave a Reply

Your email address will not be published. Required fields are marked *

error: Content is protected !!