C Ronaldo’an Euro sponsor tur Coca-Cola aiin tui a thlang

Euro 2020 sponsor tu pakhat Coca-Cola chuan press conference room-ah Coca-Cola bottle an dah a, hei vang hian Cristiano Ronaldo chu a hlim vak lo niin a lang. American company Coca Cola hian Euro 2020 an sponsor ve a ni.

Press conference room-ah hian Cristiano Ronaldo hmaah Coca-Cola bottle hmuh a ni, camera-a a lan dan chuan C Ronaldo hian a sawn nghal a, tui bottle chu a chawi kangin, “agua” tiin a sawi, hei hi Portuguese tawng chuan tui tihna a ni. C Ronaldo chuan mipuite chu hriselna atan hetiang drinks lam aiin tui intam zawk turin a duh a ni.

Cristiano Ronaldo hian a career ah hriselna lam a ngai pawimawh hle a, hei vang hian hriselna leh fitness lam pawh a hre zau hle a ni. Ballon d’Or vawi 5 lai hnehna chang tawhtu Cristiano Ronaldo hmaah Coca Cola awm vanga a hlim lo hi a mak hran lo.

Hei hi Euro 2020 sponsor tu Coca Cola tan chuan a nawm loh viau a rinawm. Euro 2020 sponsor tu zingah tel ve mahse, C Ronaldo’an mipui hmuh theih turin a do tlat mai, Euro 2020 organizers te hian Press conference room a Cocacola bottle an dah chungchang hi an ngaihtuah that a ngai mai thei niin Sportskeeda chuan an tarlang.

Tun hi Cristiano Ronaldo’an Coca Cola a sawisel vawikhatna a ni lova, a hma pawhin alo sawisel tawh.

Dubai a Global Soccer Awards 2020 semna hun an hman lai khan Cristiano Ronaldo chuan Coca Cola that loh zia a sawi. A fapa chu Coca Cola leh Crisps atanga a inthiarfilim tur thu a sawi.

“Ka fapa hi footballer ropui tak ni turin ka duh hle. A chang changin Coke a in thin a, crisps te pawh a ei ve bawk thin, hei hian min ti buai tlat thin, amah pawhin a hria. A changin ka fapa chu ka hrilh thin a, tlan zawhah tui vawt in thin turin ka hrilh” tiin Ronaldo chuan a sawi.

Source SK

Related Posts

Leave a Reply

Your email address will not be published. Required fields are marked *

error: Content is protected !!