Barcelona rawlthar Pedri’an 2021 Golden Boy Award a dawng

Barcelona midfield che tha tak Pedro Gonzalez Lopez, Pedri tia hriat lar zawk chuan 2021 Golden Boy award a dawng.

Pedri hi FC Barcelona player lak luhah chuan che tha ber pawl a ni. Kum 18 a upa hian Las Palmas atang Catalan club lian hi a zawm a, a man hi €5 million chauh a ni.

A kum la naupang viau rih mahse, Pedri hi Barcelona first team player hman rim ber pakhat a ni. Season hmasa khan Catalan club tan match 52 lai a inlan tling a ni. Barca in Copa Del Rey an chawi theihnaah pawh player pawimawh tak a ni.

Hma a sawn chak em avangin Euro 2020 ah khan Spanish international team tan khel ve tura koh a ni. Euro 2020 ah pawh khan Young Player of the Tournament atan an thlang nghe nghe.

Tokyo Olympic Games-ah Spain chuan Silver an la a, he squad ah pawh hian Pedri a tel a ni.

2021 Golden Boy award a dawng a, he award hi season liamtaa rawlthar player che tha hnenah hlan a ni thin.

Pedri tan he award a hlutna em em pakhat chu FC Barcelona player zinga dawng thei player pahnihna a ni. He award dawngtu hi tudang ni lovin Lionel Messi hi a ni, kum 2005 khan alo dawng tawh.

Pedri hi Golden Boy award dawngtu player tha tak tak te huangah a awm der tawh a, Golden Boy award lo dawng tawhte zingah Leo Messi, Wayne Rooney, Paul Pogba, Kylian Mbappe leh Erling Haaland te hi an langsar hle.

Pedri hian Jude Bellingham, Jamal Musiala, Florian Wirtz leh Barcelona lama a teammate Gavi te chu a hneh.

2021 Golden Boy award a dawn vangin Pedri chuan lawmthu a sawi.

“Tuttosport chungah ka lawm hle, ka inchhuang hle bawk. He award buaipuitu leh fans te chungah ka lawm tak zet” Tiin Pedri chuan a sawi.

Source SK

Related Posts

Leave a Reply

Your email address will not be published. Required fields are marked *

error: Content is protected !!