Ballon d’Or chungchangah mitlawmngai N’Golo Kante a tawng chhuak

Kan hriat angin Chelsea star N’Golo Kante chu kumin Ballon d’Or dawng tura rinkai ber pakhat a ni. French midfielder hian France Football trophy chungchang sawi tur chuan a la hma in, kawng thui tak zawh tur ala awm rih niin a sawi.

N’Golo Kante hi Chelsea in UEFA Champions League nomawi an chawi theihnaah a thawhhlawk hle a. Final match leh knockout stage thenkhattah pawh khan Man of the Match atana thlan a ni nghe nghe. Fan tamtakin kumin Ballon d’Or dawng tura an rin ber leh phu bera an ngaih a ni mek.

Euro 2020 khelh tur chungchangah Kante hi kawm a ni a, Ballon d’Or chungchangah a ngaih dan an zawt. Chelsea midfielder hian he award chungchang sawina atan chuan a la hma hle tiin a sawi. Kumin Ballon d’Or hi December thla khian a dawngtu tur thlan chhuah hnenah pek a ni ang.

“Tun hi Ballon d’Or chungchang sawina atan chuan la hma hle. Kum laihawl velah kan la awm a, thla 6 chhung teh meuh mai a la bak. Inelna hrang hrang match khelh tur a la tam lutuk. Vawiinah hian ka phu ber tia han sawi thei ka nih rih lo. Kum tlemte liamtaah khan top 10 ah ka lang ve a, hei hi a vawikhatna niin a duhawm hle. Mahse, hnehna chan chu thawnthu dang daih a ni.”

“Hei hi mimal chawimawina ropui tak a ni a, Season khata player che tha tak te hnenah pek a ni thin tih chu ka hmu. Hemi duh vang ngawr ngawr a bei ka ni lova, ka goal pawh a ni hek lo. He award lo dawng tawhtu te hian an career-ah ropui takin thil tamtak an ti hlawhtling a ni.” tiin Chelsea midfielder N’Golo Kante chuan a sawi.

Ballon d’Or nominee zinga tel ve tho leh France tana a teammate Kylian Mbappe aiin Kante’an Ballon d’Or a dawn zawk ringtu an tam.

Tuna a lan dan chuan Kylian Mbappe aiin Kante hian Ballon d’Or a dawn zawk a rinawm a, hemi chungchangah Kante chuan ti hian a sawi.

“Hemi chungchang hi ka ka vei ber a ni lo, Team in goal an khung theihna tur zawk hi ka focus a ni. Tlem chuan ka rilru-ah a awm ve tho a, mahse, englai pawhin kan tih tawh anga chet that zel hi kan tum. Pangai takin pitch chhungah theihna zawng zawng pek hi a ni. Fakna kan hmuhin a lawmawm hle, mahse, hei hi a pawimawh ber a ni lo.” tiin a sawi bawk.

Kylian Mbappe leh N’Golo Kante hi France team tan an khel ve ve dawn a, tu zawk hian nge Ballon d’Or dawng ta ang le?

Related Posts

Leave a Reply

Your email address will not be published. Required fields are marked *

error: Content is protected !!